Kape Muna!

Hindi kumpleto ang araw ng maraming mga tao kung hindi makakainom ng kape. Addictive kasi ito dahil sa content nitong caffeine. Pero ano nga ba ang paki elam ng marami sa caffeine? Kahit na nga ba sandali lang sila alerto at kailangan nanamang uminom ng kape pamaya-maya at hindi na napapansing nakaka isang timba ka na sa maghapon. Ano nga ba naman ang pakielam natin kung mahihirapan kang masatisfy sa tulog mo at nenerbyusin ka sa kakainom ng kape? Kaya maraming inaatake sa puso. Kagaya ko, marami kasing nuknukan ng kukulit at hindi mabawalan. Kita mo, tatawid pa rin yan kahit na sabihin pa sa naglalakihang mga karatulang imposibleng hindi mo makita na "BAWAL TUMAWID, NAKAMAMATAY!". Isang Linggo lang nung mapalitan iyon ng "BAWAL TUMAWID, MAY NAMATAY NA DITO!". Hindi na ako nagtataka kung bukas makalawa ay mapapalitan iyon ng "BAWAL TUMAWID, MARAMI NG NAMATAY DITO! GUSTO MONG SUMUNOD?". Ang kaso sabi ng nakakwentuhan kong taxi driver, malamang sa tatawid pa rin sila duon --- ang dapat daw, "DITO ANG TAWIRAN!" para huwag duon tumawid. Kung sabagay mas madali nga namang makipagpatintero sa mga humaharurot na sasakyan, kaysa umakyat safely sa mga foot bridge. Mapapadali rin naman ang buhay mo.

Hindi rin naman talaga kape ang nakakadiabetic, pasok sa banga ang justification ni Tatay na okey lang syang uminom ng kape kahit na diabetic sya. Less sugar naman daw manang mana sa anak kung makapag - justify. Ang kaso, less sugar nga kung makainom naman sya isang garapon per serving, at sa maghapon nakaka apat na litro sya ng kape. Ang kulit talaga, at kahit na bawalan mo, magkakape pa rin sya.

Kung sabagay, mahusay nga namang pampainit ng sikmura ang kape. Pagkatapos, sisikmurain ka naman. Naiirita kasi sa kape ang tiyan, kaya nagproprodyus ito ng maraming gastric juices.

Pero sa anu't ano man, dahil sa makulit ako. Kahit na nga ba maraming bad effects ang kape, iinom pa rin ako. Bata pa lang kasi ako nang magsimulang maadik sa kape at habang lumalaki mas lumalakas akong uminom ng kape. 

Nakaka-aliw naman kasi ang kape. Kakaiba ang aroma nito, amoy palang nakakagising na. Masarap rin itong sawsawan ng pandesal, pansabaw sa bahaw, at iced coffee (nagtataka ako dati kay nanay, pwede kaming uminom ng ice coffee pero hindi pwedeng uminom ng mainit na kape, e pareho lang namang kape yun.) at ang talaga namang nakakapag pasarap sa kape ay marami itong napapasarap na mga kwentuhan. Kaya kahit na nga ba maraming bad effects, gora pa rin sa pag inom ng kape.

Basta ang bilin ni Papa Vic, hindi masama ang sobra ang masama yung hindi marunong mag - alok. Kaya, kape muna tayo!